इम्बोष्ड नम्बर प्लेट जडान रोक्न सर्वोच्चको आदेश

सर्वोच्च अदालतले यातायात व्यवस्था विभागलाई इम्बोष्ड नम्बर प्लेट जडान गर्ने कार्य यथास्थितिमा राख्न अन्तरिम आदेश दिएको छ । प्रदेशको नामाङकन नभई यातायातका साधनमा विभागले प्रदेश एक, दुई भन्दै नयाँ नम्बर प्लेट जडान गर्दै आएको थियो । 

प्रधानन्यायाधीश गोपाल पराजुलीको एकल इजलासले इम्बोष्ड नम्बर प्लेट जडान गर्ने विषयमा सरकारका नाममा कारण देखाउ आदेश समेत दिएको छ । वातावरणकर्मी भरत बस्नेतले इम्बोष्ड नम्बर प्लेटमा प्रयोग हुने चिप्सले मुलुकको सुरक्षा व्यवस्था जोखिममा पर्न सक्ने भन्दै तत्काल रोक्न माग गर्दै रिट दायर गर्नुभएको थियो । अन्तरिम आदेश सम्बन्धमा छलफल गर्न सर्वोच्चले दुवै पक्षलाई बोलाएको छ । हालसम्म विभागले १ हजार ७  सय वटा सवारी साधनमा इम्बोष्ड नम्बर प्लेट जडान गरिसकेको छ । इम्बोष्डका लागि थप ५ हजार सवारी धनीले निवेदन दिएका छन् । मुलुक संघीयतामा प्रवेश गरेसँगै विभागले पुरानो नम्बर प्लेट बिस्थापित गर्दै प्रदेश नम्बर र अञ्चलको नाम सहित अंग्रेजी अक्षर उल्लेख नम्बर प्लेट दर्ता सुरु गरेको थियो ।